Efektet financiare nga miratimi i paketës fiskale 2023 për individët, bizneset dhe Buxhetin e Shtetit

Nga llogaritja e përmbledhur mbi efektet e paketës fiskale 2023, sipas tabelës për të katër ligjet që kanë edhe efekte direkte buxhetore dhe financiare për individët dhe bizneset, sipas llogaritjeve që përkojnë në pjesët kryesore (përveç projekt-ligjit për TVSH) me llogaritjet e MFE, rezulton se:

1. Për tatimin mbi të ardhurat

• efektet negative për individët e vetëpunësuar do të jenë 2 miliard lekë në vit nga taksimi profesioneve të lira dhe bizneseve sipas fashave progressive, duke llogaritur një efekt të korrektuar nga erozioni tatimor (shmangie tatimore dhe evasion tatimor);
• Për bizneset e vendit do të ketë një përfitim neto nga ruajtja e një pjese të tyre pa tatimin e thjeshtuar mbi fitimin mbi biznesin e vogël në vlerën përfituese prej jo më shumë se 350 milionë lekë në vit
• Nga rritja e pragut të tatueshëm të pagave do të ketë një përfitim nga punëmarrësit plus 1 miliard lekë në vit, i cili deri në vitin 2022 u mbahej nga të ardhurat e tyre nga puna.
• Efektet në buxhetin e shtetit llogariten me një përfitim neto prej 650 milion lekë.

2. Për akcizën

• efektet pozitive për individët me përjashtimin e akcizës për akumulatorët e automjeteve elektrike llogaritet me një ndikim vjetor 50 milionë lekë;
• efektet negative për bizneset prodhuese dhe importuese të birrës janë 262 milionë lekë në vit, me një ndikim në rritje në çmimin e birrës dhe ndoshta edhe në pakësim të konsumit.
• Efektet neto në buxhetin e shtetit llogariten me një përfitim 212 milion lekë

3. Për TVSH-në

• efektet nga përjashtimi për vitin 2023 i druve të zjarrit, paletave për ngrohje etj. Ka një përfitim për individët prej 50 milionë lekë për gjithë vitin
• efekti nga përjashtimi prej TVSH i importit/furnizimit brenda vendit të energjisë elektrike që do shitet nga platforma e Bursës Energjetike Shqiptare llogariten sipas ekspertëve të ALTAX në një vlerë neto për buxhetin me 300 milion lekë në vit

4. Për Taksat kombëtare

• efektet nga heqja e taksës për produktin hirrë qumështi dhe taksës për krem qumështi llogariten me një përfitim për bizneset në 10 milionë lekë në vit.

Në mbyllje, në llogaritjen e efekteve pozitive dhe negative për biznesin dhe individët, si ndikim nga miratimi i ligjeve që përbëjnë Paketën Fiskale 2023, nga llogaritja krahasuese rezultante me vitin 2022 duket se:

INDIVIDËT

• 950 milion lekë më pak për individët e vetëpunësuar në shërbimet profesionale si barrë e shtuar nga përfshirja në skemën e tatimit mbi të ardhurat
• 1 miliard lekë përfitime për punëmarrësit që i përkasin fashës së pagave minimale nga 40 mijë deri 50 mijë lekë/muaj, si një e ardhur mujore që mesatarisht përkon mesatarisht për 70 mijë punëmarrës me 1.200 lekë më shumë të ardhura në muaj, nga kjo masë fiskale
• 950 milionë lekë më pak u mbeten si të ardhura të disponueshme individëve në vitin 2023 nga efekti i politikës fiskale.

BIZNESET

• 105 milionë lekë përfitime neto nga (a) ruajtja e tatimit të thjeshtuar mbi fitimin zero përqind deri në 2029 për një kategori më të kufizuar të bizneseve, (b) rritjes së akcizës së birrës për prodhuesit dhe importuesit e vegjël, (c) përjashtimi nga TVSH të biznesit të druve të zjarrit, (d) heqjes së taksë së hirrës qumështit.
• 105 milionë lekë më shumë u shtohen bizneseve nga efektet e politikës fiskale për 2023

BUXHETI I SHTETIT

1.14 miliard lekë përfiton të ardhura tatimore dhe doganore neto buxheti i shtetit nëpërmjet ndryshimeve ligjore pas miratimit të tre ligjeve (me përjashtim të ligjit të taksave kombëtare, ku nuk ka përfitim në buxhet).