Dega e shoqërisë së huaj dhe përfshirja e ortakëve

Në zbatim të Ligjit nr. 9901, datë 14.04.2008 “Për tregtarët dhe shoqëritë tregtare”, sqarojmë dallimin midis “Degës së shoqërisë së huaj” dhe “Shoqërisë tregtare” si dy forma të ndryshme të ushtrimit të aktivitetit ekonomik në Shqipëri.

Dega e shoqërisë së huaj përfaqëson një njësi të varur që ushtron aktivitet në emër të një shoqërie të regjistruar jashtë vendit.

Ajo nuk ka personalitet juridik të veçantë, nuk zotëron kapital të regjistruar dhe nuk mund të ketë pasuri apo detyrime të ndara nga shoqëria mëmë.

Të gjitha detyrimet dhe pasuritë e degës janë të shoqërisë mëmë.

Përfaqësimi ligjor i degës bëhet nga një person i emëruar nga shoqëria mëmë dhe regjistrimi realizohet pranë Qendrës Kombëtare të Biznesit (QKB).

Sipas ligjit, dega e shoqërisë së huaj nuk mund të ketë ortakë ose persona të tjerë që zotërojnë pjesë në kapitalin e saj. Çdo aktivitet i degës kryhet në emër të shoqërisë mëmë, e cila mban përgjegjësinë ligjore dhe financiare. Dega nuk krijon marrëdhënie pronësie me persona të tjerë juridikë apo fizikë në Shqipëri.

Në rast se një person shqiptar ose i huaj dëshiron të përfshihet në aktivitetin ekonomik të një shoqërie të huaj, ligji parashikon dy mënyra të ligjshme për këtë:

• e para është themelimi i një shoqërie të re tregtare, ku shoqëria e huaj mund të jetë ortak themelues bashkë me persona të tjerë. Kjo shoqëri e re ka personalitet juridik të pavarur dhe kapital të regjistruar në QKB.
• e dyta është lidhja e marrëveshjeve bashkëpunimi, ku shoqëria e huaj mund të bashkëpunojë me persona të tjerë për shërbime ose projekte të përbashkëta, pa krijuar marrëdhënie ortakërie.

Pra, degës së shoqërisë së huaj nuk mund t’i shtohet një ortak. Çdo përfshirje e një personi tjetër si ortak kërkon themelimin e një shoqërie të re tregtare, ku shoqëria e huaj të jetë pjesëmarrëse me kapital.