ALTAX publikon analizën mbi qëndrueshmërinë ekonomike të Shqipërisë në kushtet e varësisë nga turizmi

ALTAX ka publikuar analizën e tij të re analitike me titull “Turizmi dhe qëndrueshmëria e rritjes ekonomike në Shqipëri: Krahasime dhe strategji në kushtet e pasigurisë globale”, e cila synon të vlerësojë rreziqet dhe mundësitë që paraqet turizmi si një nga shtyllat kryesore të ekonomisë shqiptare.

Analiza ndërton një krahasim të thelluar me vendet e rajonit me përvojë të ngjashme – Greqinë, Kroacinë dhe Malin e Zi – duke ofruar një lexim kritik të modelit shqiptar të zhvillimit turistik dhe ndikimit të tij në ekonomi, financa publike, strukturën rajonale dhe përfshirjen sociale.

Pikat kyçe të analizës:

• Shqipëria në 2023 arriti mbi 10 milion vizitorë, me një ndikim që përfaqëson mbi 17% të PBB-së, por pa instrumente stabiliteti përballë krizave të ardhshme;
• Mbi 60% e strukturave turistike operojnë në informalitet, duke krijuar boshllëqe në të ardhura buxhetore dhe cilësi shërbimi;
• Zonat e brendshme të vendit janë të përjashtuara nga përfitimet turistike, duke thelluar pabarazitë rajonale;
• Mungesa e një Fondi të Stabilitetit Turistik dhe e politikave gjithëvjetore rrezikon të kthejë turizmin në një burim brishtësie më shumë sesa zhvillimi;
• Nevojitet një ndryshim paradigme për të kaluar nga modeli sezonal, informal dhe i përqendruar, në një turizëm të integruar, gjithëvjetor dhe të qëndrueshëm.

Rekomandimet e analizës për politikëbërësit:

1. Krijimi i instrumenteve makroekonomike të mbrojtjes dhe kursimit;
2. Formalizim fiskal dhe rregullim i tregut të akomodimit;
3. Zhvillimi i zonave të brendshme përmes agroturizmit dhe korridoreve tematike;
4. Skema sigurimi sociale për punëtorët sezonalë dhe integrim më i madh i komuniteteve lokale;
5. Ndërtimi i politikave të bazuara në të dhëna dhe bashkëpunim ndërinstitucional.

Kjo analizë synon të shërbejë si një instrument orientues për vendimmarrjen publike, zhvilluesit ekonomikë dhe aktorët socialë, me qëllimin përfundimtar të konsolidimit të një modeli turizmi që kontribuon në zhvillimin e qëndrueshëm, barazi territoriale dhe stabilitet afatgjatë.

🔗 Analiza e plotë është e disponueshme në Publikimet