Publikohen raportet e indeksit të fizibilitetit për premtimet elektorale të zgjedhjeve 2025

ALTAX në bashkëpunim me POLIFAKT njofton publikimin zyrtar të raporteve analitike të fizibilitetit për premtimet elektorale të katër subjekteve politike që marrin pjesë në zgjedhjet parlamentare të vitit 2025:

• Partia Socialiste e Shqipërisë (PS)
• Partia Demokratike (PD)
• Lëvizja BASHKË
• Shqipëria Bëhet

Këto raporte janë pjesë e një fushate 20-ditore të transparencës dhe vlerësimit të realizueshmërisë së programeve politike, duke vendosur në fokus analizën e detajuar të përmbajtjes së ofertave elektorale dhe vlerësimin teknik të mundësisë së zbatimit të tyre në praktikë.
Çfarë përmbajnë raportet?

Secili raport përmban:

• Analizën e indeksit të fizibilitetit – një tregues që mat realizueshmërinë e premtimeve duke marrë parasysh koston buxhetore dhe efektet ne ekonomi, kohën e zbatimit, burimet njerëzore dhe financiare, si dhe sfidat legjislative dhe institucionale;
• Vlerësime krahasuese të prioriteteve dhe politikave të propozuara për periudhën 2025–2029;
• Koment politik dhe ekonomik neutral, i bazuar në të dhëna të hapura, buxhetore dhe strategjike kombëtare;
• Skemë vizuale të shpërndarjes së premtimeve sipas fushave: ekonomi, punësim, energji, arsim, shëndetësi, bujqësi, mjedis, qeverisje, dhe politika sociale.

🔍 Ky projekt synon të ndihmojë qytetarët, gazetarët, shoqërinë civile, institucionet akademike, si edhe votuesit për herë të parë, që të votojnë të informuar dhe të kuptojnë më mirë nëse premtimet politike kanë baza reale për zbatim apo janë thjesht instrumente retorike.

Raporti krijon një mjet presioni dhe përgjegjshmërie publike, pasi ofron një standard objektiv me të cilin votuesit mund të mbajnë përgjegjëse partitë politike gjatë dhe pas mandatit qeverisës.

Të gjithë raportet janë tashmë të publikuara dhe të disponueshme për shkarkim të plotë në PDF në platformën zyrtare të POLIFAKT:

📥 www.polifakt.al

Ky projekt është pjesë e angazhimit për rritjen e transparencës elektorale, përmirësimin e debateve politike të bazuara në fakte, dhe fuqizimin e zgjedhësve nëpërmjet informacionit të besueshëm.