Bilanci i pagesave 6 mujori I 2025 dhe tendencat e ekonomisë

Bilanci i pagesave në periudhën e parë të vitit 2025 paraqet disa ndryshime të lehta krahasuar me gjashtëmujorin e parë 2024, por në thelb mbetet i njëjtë në strukturë.

1. Llogaria korrente

Në gjashtëmujorin e parë të 2024, deficiti i llogarisë korrente arriti në -579 milionë euro. Në të njëjtën periudhë të 2025 ky deficit zbriti lehtësisht në -561 milionë euro. Në pamje të parë duket si një përmirësim i vogël, por duke parë faktin se edhe viti i plotë 2024 mbyllet me -610 milionë euro, kuptohet që bilanci i jashtëm i vendit mbetet i dobët.

Pra, problemi themelor, çekuilibri i madh mes mallrave dhe shërbimeve nuk është zgjidhur, vetëm sa është kompensuar disi nga shërbimet dhe turizmi.

2. Mallrat

Në mallra, tabloja është më e qartë: deficiti thellohet.

Në 6-mujorin 2024 është -2,591 milionë euro

Në 6-mujorin 2025 është -2,711 milionë euro
Pra, kemi një përkeqësim me rreth 120 milionë euro.
Nëse shohim vitin e plotë 2024, deficiti ka qenë -5,592 milionë euro, që konfirmon se importet vazhdojnë të dominojnë tregtinë e jashtme dhe eksportet nuk po arrijnë të fitojnë terren.

Tendenca e 2025 është e njëjtë, ku mallrat mbeten plagë e hapur e bilancit tregtar.

3. Shërbimet

Në shërbime, panorama është më pozitive.

Në 6-mujorin 2024, teprica ishte +1,493 milionë euro

Në 6-mujorin 2025, u rrit në +1,589 milionë euro
Edhe pse ndryshimi është i moderuar, shërbimet kanë ruajtur rol vendimtar në kompensimin e deficitit nga mallrat.

Viti i plotë 2024 e mbylli me një tepricë të fortë +3,875 milionë euro, çka tregon se ky sektor është stabël dhe me tendencë në rritje.

4. Udhëtimet (turizmi)

Turizmi është përbërësi më dinamik.

Në 6-mujorin 2024 është +740 milionë euro

Në 6-mujorin 2025 është +798 milionë euro
Rritja me 58 milionë euro tregon se hyrjet nga turistët e huaj po vijojnë të rriten.

Në të njëjtën kohë, viti i plotë 2024 mbylli me +2,292 milionë euro nga udhëtimet, që dëshmon se turizmi është kthyer në “motorin” kryesor të shërbimeve dhe një shtyllë të ekonomisë.

Tendenca është pozitive dhe e qëndrueshme. Turizmi jo vetëm që rritet, por edhe zbut presionin nga importet e larta të mallrave.

5. Remitancat

Të ardhurat nga emigrantët janë burim i sigurt.

Në 6-mujorin 2024 është +510 milionë euro

Në 6-mujorin 2025 është +532 milionë euro
Rritja është e moderuar, vetëm 22 milionë euro, por konsistenca e remitancave është elementi kryesor. Edhe në vitin e plotë 2024 ato sollën +1,045 milionë euro.

Tendenca e 2025 tregon që remitancat janë të qëndrueshme, por pa ndonjë hov të madh rritës.

6. Investimet e huaja direkte (IHD)

IHD-të mbeten në nivele pothuaj të pandryshuara.

Në 6-mujorin 2024 është +751 milionë euro

Në 6-mujorin 2025 është +759 milionë euro
Pra, vetëm +8 milionë euro më shumë.
Megjithatë, struktura është interesante:

• Riinvestimi i fitimeve është rritur (394 → 420 milionë euro), çka tregon besim të kompanive ekzistuese për të rishfrytëzuar fitimet.
• Kapitali i ri dhe aksionet janë rritur lehtë (337 → 345 milionë euro).
• Instrumentet e borxhit kanë kaluar nga +20 milionë në -7 milionë euro, që sinjalizon një prirje të huajve për të mos shtuar huatë ndaj kompanive shqiptare.

Në total, IHD-të mbeten të qëndrueshme, por nuk shfaqin dinamizëm për hyrje të reja të mëdha kapitale.

Nga viti 2024 tek 2025 deficiti i llogarisë korrente nuk ka ndryshime të mëdha. Thelbi i problemit mbetet tek mallrat.

Shërbimet dhe sidomos turizmi po e mbajnë në ekuilibër bilancin, duke treguar vazhdimësi pozitive.

Remitancat janë të forta, por nuk mund të konsiderohen motor zhvillimi, pasi janë më shumë konsumi familjar sesa investim produktiv.

IHD-të tregojnë që Shqipëria tërheq më shumë riinvestim të atyre që janë brenda vendit, sesa investime të reja nga jashtë. Ky është një sinjal i rëndësishëm për politikat publike.

2024 vs 2025 (6-mujorët e parë), përmirësim i lehtë në llogarinë korrente, falë shërbimeve dhe remitancave, por jo një ndryshim strukturor.

Mallrat mbeten faktor negativ, duke treguar mungesën e konkurrueshmërisë së eksporteve.

Shërbimet dhe turizmi janë shpëtimtarët e bilancit dhe pritet të vazhdojnë të rriten.

Remitancat janë të qëndrueshme, por nuk gjenerojnë zhvillim afatgjatë.Investimet e huaja janë të stabilizuara, por jo të mjaftueshme për një ndryshim të madh ekonomik.