Analiza e ALTAX: Shqipëria përballë pasigurive energjetike.

Si duhet të reagojmë ndaj skenarëve të çmimeve të naftës në 2025?

Në një klimë globale të pasigurt, ku tensionet gjeopolitike në Ngushticën e Hormuzit dhe luhatjet në tregjet ndërkombëtare të naftës po kthehen në kërcënime reale për stabilitetin ekonomik, ALTAX sjell një analizë strategjike për vitin 2025, me fokus të veçantë në qëndrueshmërinë energjetike dhe menaxhimin e goditjeve të jashtme.

Tre skenarë të çmimeve të naftës (rritje modeste, rritje e lartë dhe rënie e çmimeve) shërbejnë si bosht për të analizuar ndikimet në inflacion, bilancin e pagesave, tregtinë, buxhetin dhe mirëqenien e konsumatorëve shqiptarë. Çdo skenar është i shoqëruar me një set masash të dedikuara që përfshijnë:

• Diversifikimin e furnizimit dhe rritjen e rezervave strategjike
• Zgjerimin e investimeve në energji të ripërtëritshme dhe eficiencë
• Mekanizma kompensues për periudha krizash
• Bashkëpunimin rajonal për siguri dhe eficiencë në furnizim

Mësimet nga e kaluara, sidomos krizat e mëparshme të furnizimit, kanë treguar se mungesa e rezervave të sigurta dhe varësia e lartë nga importi e bëjnë ekonominë shqiptare të cenueshme. Vendet fqinje si Kroacia, Serbia dhe Maqedonia e Veriut kanë ndërmarrë masa konkrete për të zgjeruar kapacitetet e magazinimit dhe për të diversifikuar burimet, një drejtim që Shqipëria duhet ta ndjekë me përparësi.

ALTAX thekson se energjia nuk është vetëm një mall tregu, por një instrument strategjik zhvillimi. Prandaj, politika energjetike duhet të lidhet ngushtë me sigurinë kombëtare, stabilitetin makroekonomik dhe mirëqenien e qytetarëve.

Kjo analizë u shërben:

• Politikbërësve që kërkojnë vendimmarrje të bazuar në skenarë dhe parashikime reale,
• Bizneseve që duan të kuptojnë ndikimin e çmimeve të energjisë mbi kostot dhe zinxhirët e furnizimit,
• Qytetarëve që duan transparencë për çmimet dhe masat mbrojtëse ndaj goditjeve ekonomike.

Lexo analizën e plotë të ALTAX në publikimin e ri.