Përjashtimi nga tvsh i furnizimit të shërbimeve të formimit profesional nëpërmjet kurseve
Rasti
Kurse trajnimi profesional, që organizohen nëpërmjet një licence për formim profesional organizohen mbi bazë të një program. Çfarë parasheh ligji dhe Udhëzimi i TVSH për trajtimin e furnizimit të shërbimeve që kryejnë bizneset dhe OJF?
Përgjigja
Sipas ligjit Nr.92/2014, i ndryshuar, në Nenin 51, në pikën g. të tij “furnizimi i shërbimeve të edukimit të fëmijëve dhe të rinjve, të mësimdhënies shkollore apo universitare, formimit profesional dhe rikualifikimit, përfshirë furnizimin e shërbimeve dhe mallrave ngushtësisht të lidhura me to nga institucionet arsimore, publike dhe private, të njohura si të tilla nga autoriteti kompetent shtetëror, në përputhje me legjislacionin përkatës të fushës” janë furnizime të përjashtuara nga TVSH.
Sipas Udhëzimit Nr.6, datë 30.01.2015, në nenin 39, në pikën 1. “përjashtimi zbatohet për furnizimet e mirëfillta të mësimdhënies shkollore, universitare, formimit profesional dhe rikualifikimit, përfshirë furnizimin e shërbimeve ose të mallrave të lidhura ngushtë me këtë mësimdhënie”. Por nuk përfshihen shërbimet e ofruara nga institucione që ofrojnë kurse trajnimi, kualifikimi, kurse të tjera speciale ose profesionale, nëpërmjet të cilave nuk merret një formim i vazhdueshëm për pjesëmarrësit, i cili në përfundim të tij të shoqërohet me diploma të vlefshme për t’u njohur si profesion (zanat, specializim).
Në rastet kur kemi shërbime edukimi (kurse), nëpërmjet të cilave klienti merr ose zhvillon më tej njohuritë e tij në një fushë të caktuar të profesionit, këto furnizime nuk përfitojnë nga e drejta e përjashtimit nga TVSH.
Në vijim të sqarimit nga udhëzimi për zbatimin e përjashtimit, konsiderohen furnizim i shërbimeve të edukimit të fëmijëve dhe të rinjve, të mësimdhënies shkollore apo universitare, formimit profesional dhe rikualifikimit, “furnizimi i shërbimeve arsimore që kryhen nga institucionet arsimore plotësuese jo-publike, ku punohet në drejtim të arsimimit e të edukimit në lëndë e specialitete të veçanta që kanë të bëjnë me marrjen e njohurive në lëndë të përfshira në programin mësimor (p.sh. kurse të gjuhës së huaj, kurse për kodimin, për muzikën etj.), të miratuara nga autoriteti kompetent shtetëror”.
Në tërësi nga sa më lart, shërbimet që kanë lidhje me kodimin janë të përjashtuara nga TVSH, pasi plotësojnë kriterin e sqaruar nga Udhëzimi i TVSH, në pikën shteruese të sqaruar në paragrafin më lart.
Leave a Reply
You must be logged in to post a comment.